પાણીના બચાવ માટે આર્ટિફિશિયલ ઇન્ટેલિજન્સની મદદથી બેંગ્લોરના યુવાનોએ વોટર મેનેજમેન્ટ સિસ્ટમ વિકસાવી

યુનેસ્કોના રિપોર્ટ પ્રમાણે પાણીની જરૂરિયાત પૂરી પાડવામાં આપણો દેશ ૧૮૦ દેશોમાંથી ૧૩૩મો ક્રમ ધરાવે છે. દેશમાં પાણી પ્રતિ વ્યક્તિ ૧૮૮૦ ક્યુબિક મીટર છે. એક રિપોર્ટ પ્રમાણે ૨૦૩૦ સુધીમાં જો પાણીની જાણવણી વિષે ઠોસ કદમ ઉપાડવામાં ના આવ્યા તો ભારતમાં દુષ્કાળની પરિસ્થિતિ સર્જાઈ શકે છે.

પાણીનો સંગ્રહ કરવા તેમજ પાણીનો યોગ્ય વપરાશ કરવા માટે બેંગલુરુના ચાર યુવાનો રોહિત નારા, સિદ્ઘાર્થ વૈદ્યનાથ, સોરિશ અને કનિષ અગ્રવાલે સ્માર્ટ વોટર મેનેજમેન્ટ સિસ્ટમનો આવિષ્કાર કર્યો છે. આર્ટફિશિયલ ઇન્ટેલિજન્ટસનાં માધ્યમ દ્વારા આ સિસ્ટમથી પાણીનો વપરાશ, ટેંકમાં રહેલ પાણીનું લેવલ અને પાણીના વિતરણ પર અંકુશ રાખી શકાય છે. આ સિસ્ટમના સરળ ઉપયોગ માટે એક એપ પણ બનાવવામાં આવી છે, જેના માધ્યમથી વોટર પમ્પને ઓન-ઓફ કરી શકાય છે.

યોર સ્ટોરીસાથે ચર્ચા દરમિયાન સિદ્ધાર્થ વૈદ્યનાથે જણાવ્યું હતું કે “ભૂગર્ભ પાઈપ દ્વારા સરકાર લોકોને પાણી પૂરું પાડે છે. પૂરા પાડવામાં આવેલ પાણીમાં ૪૫ ટકા પાણીનું નુકસાન જોવા મળે છે. આખા પુરવઠામાંથી ૪૫ ટકા પાણી લીકેજ અને બીજી કેટલીક સમસ્યાઓને કારણે વેડફાઈ જાય છે. અમારો ઉદ્દેશ આ જ પાણીનો બચાવ કરવાનો છે.”

સ્માર્ટ વોટર મેનેજમેન્ટ સિસ્ટમમાં ઓટોમેટેડ વાલ્વ ફીટ કરવામાં આવ્યા છે, જેની મદદથી પાણીના ડિસ્ટ્રીબ્યુશન અને વેસ્ટેજ વોટરનું નિયંત્રણ કરી શકાય છે. આ ઉપરાંત આ સિસ્ટમ દિવસ દરમ્યાન કરવામાં આવતા પાણીનો ઉપયોગ પણ દર્શાવે છે, તેમજ પાણીના સ્ટોરેજની ક્ષમતા અને તેનું આંકલન પણ કરે છે. વધારાના ફિચર્સની વાત કરવામાં આવે તો આ સિસ્ટમ દ્વારા પાણીની પાઇપમાં ભંગાણ, સંગ્રહ ટાંકીમાં પાણીનુ લેવલ, ઓવરફ્લો થતા પાઇપની જાણકારી અને જો કોઈ મોટર કે પાર્ટ્સમાં ખામી હોય તેની જાણકારી પણ સહેલાઇથી મેળવી શકાય છે.

મોટર કંટ્રોલર્સ, અલ્ટ્રાસોનિક સેન્સર્સ અને ફ્લો સેન્સર્સની મદદથી પાણીના ઉપયોગ પર નિયંત્રણ સાથે પાણીના વપરાશની માહિતી પણ મેળવી શકાય છે. આ સિસ્ટમના વેચાણ માટે આ યુવાનો દ્વારા વર્ષ ૨૦૧૬માં AGUA કંપનીની શરૂઆત કરવામાં આવી હતી. જો આવી વાયરલેસ સિસ્ટમ ઘરમાં ઇન્સ્ટોલ કરાવવી હોય તો ૧૫-૨૦ હજાર અને જો વાયર સહિતની સિસ્ટમ ઇન્સ્ટોલ કરાવી હોય તો માત્ર ૩-૫ હજારનો ખર્ચ થાય છે. આટલા ઓછા ખર્ચમાં પાણી સંગ્રહ કરવાની સાથે પાણી બચાવી પણ શકાય છે.

Leave a Reply